Известные имена

Құрметті оқырмандар!

2004 жылдан бастап "Шығыс Қазақстан танымал есімдер" дерекқорын толықтыру жұмыстары жүргізілуде. Жобаның мақсаты – Шығыс Қазақстан өңірінің барлық танымал тұлғалары туралы барынша толық ақпарат жинау. Бүгінгі таңда бұл ақпараттық ресурста біздің жерлес ақын-жазушылар, ғалымдар мен ағартушылар, Ұлы Отан соғысына қатысушылар, Алаш қайраткерлері және басқа да бөлімдер ұсынылған. Бұл – отандастарымыздың тұлға мен тағдырларында біздің бірегей өлкеміздің ортақ портретін жасауға көмектеседі.
Библиография 2018 жылға дейін жинақталғанын хабарлаймыз. Кейінірек түскен әдебиеттерді кітапхана сайтының электрондық каталогынан табуға болады: http://pushkinlibrary.kz немесе бізге мына поштаға хабарласа аласыз: spravka@pushkinlibrary.kz
Дерекқорды толықтыру жұмыстары жалғасуда және Сіз де жаңа есім немесе жаңа өмірбаяндық деректерді ұсына аласыз.  Бұл біздің ортақ жұмысымыз әрі біздің ортақ Үйімізді даңққа бөлеген азаматтар алдындағы борышымыз.

abai r pushkin r kray r  

Досанов Ғ.

Досанов Ғ. Досанов Ғазиз Досанұлы – әуесқой сазгер, ұстаз (1941-2010)

Ғазиз Досанұлы 1941 жылы Шығыс Қазақстан облысы, Күршім ауданы, Қаратоғай ауылында дүниеге келген. Сәби кезінен -ақ көз жанарынан айрылса да заман көшінен қалмай білім алуға ұмтылады. 1962 жылы Алматы қаласындағы Н. Островский атындағы зағиптарға арналған мектепті аяқтап, Семей қаласындағы М.Төлебаев атындағы музыкалық училищенің баян класына оқуға түседі. Училищені бітіргенсоң туған ауылына келіп музыка пәнінен сабақ береді. Ауыл жастарымен біріге отырып көркемөнерпаздар үйірмесінің жандануына үлкен үлес қосты. Өткен ғасырдың 70- жылдарында Қаратоғайдың Ғазиз жетекшілік еткен «Қызғалдақтар» ансамблі облысқа әйгілі болған.

1973-2001 жылдары Күршім аудандық балалар музыка мектебінде мұғалім болып қызмет істейді. Бірнеше шәкірт тәрбиелеп өсірген тағлымды ұстаз, ардақты әке, аяулы жар Ғазиз Досановтың өнегелі өмірі кімге болса да үлгілі.
2002-2009 жылдар арасында Өскемен қаласындағы Шығыс Қазақстан облыстық зағиптар мен көзі нашар көретін азаматтардың арнайы кітапханасында кітапханашы болып қызмет етті. Зағиптар мен көзі нашар көретін оқырмандарға Брайль жүйесі бойынша нотамен баян, домбырада ойнауды үйретті.
Ғазиз Досанов ең алғашқы әндерін мектеп қабырғасында жүргенде шығара бастаған еді. «Аңсадым ғой өзіңді» деп аталатын шығармасының әуені мен сөзін өзі жазды. Барлығы жиырма екіге тарта әні бар. Оның ішінде алтауы Қазақ радиосының қорынан орын алды. Алматы және облыстық Халық шығармашылығы үйі ұйымдастырған әуесқой композиторлар байқауында белсенді өнер сөрсетті. Облыстық атқару комитетінің, облыстық комсомол және кәсіподақ кеңесінің мақтау қағазымен марапатталған. 1999 жылы Қазақстан Республикасы білім және ғылым министрлігінің халыққа білім беру ісінің үздігі белгісін алған.
Ғазиз Досановтың шығармашылығы лирикалық сарында болып келеді. Туған жерге, Отанға деген махаббаты «Күршім», «Туған жер» әндерінен айқын сезіледі. «Әке тілегі», «Ақ қайың», «Немере», «Гүлсің өзің», «Ана», «Сырымды айтам» т.б. әндері жұртшылықтың көңілінен шыққан.

Досанов Ғазиз туралы:

Есембаева , Роза. Әз-аға жайлы үзік сыр [Мәтін] : [Әуесқой сазгер, қадірлі ұстаз Ғ. Досанов туралы] / Р. Есембаева // Дидар. - 2010. - 22 мамыр.- Б. 5.; Рауан. - 2010. - 24 сәуір.- Б. 5.